ยถา มาณวโก ปนฺเถ, สิงฺคาลิํ วนโคจริํ;
อตฺถกามํ ปเวเทนฺติํ [ปวทนฺติํ (ปี.)], อนตฺถกามาติ มญฺญติ;
อนตฺถกามํ สตปตฺตํ, อตฺถกาโมติ มญฺญติฯ
[86]
เอวเมว อิเธกจฺโจ, ปุคฺคโล โหติ ตาทิโส;
หิเตหิ วจนํ วุตฺโต, ปฏิคณฺหาติ วามโตฯ
[87]
เย จ โข นํ ปสํสนฺติ, ภยา อุกฺกํสยนฺติ วา [จ (สี. ปี.)];
ตญฺหิ โส มญฺญเต มิตฺตํ, สตปตฺตํว มาณโวติฯ
สตปตฺตชาตกํ นวมํฯ
280. ปุฏทูสกชาตกํ (3-3-10)
[88]
อทฺธา หิ นูน มิคราชา, ปุฏกมฺมสฺส โกวิโท;
ตถา หิ ปุฏํ ทูเสติ, อญฺญํ นูน กริสฺสติฯ
[89]
น เม มาตา วา ปิตา วา, ปุฏกมฺมสฺส โกวิโท;
กตํ กตํ โข ทูเสม, เอวํ ธมฺมมิทํ กุลํฯ
[90]
เยสํ โว เอทิโส ธมฺโม, อธมฺโม ปน กีทิโส;
มา โว ธมฺมํ อธมฺมํ วา, อทฺทสาม กุทาจนนฺติฯ
ปุฏทูสกชาตกํ ทสมํฯ
อุทปานวคฺโค [อรญฺญวคฺโค (สี. ปี. ก.)] ตติโยฯ
ตสฺสุทฺทานํ –
อุทปานวรํ วนพฺยคฺฆ กปิ, สิขินี จ พลาก รุจิรวโร;
สุชนาธิปโรมกทูส ปุน, สตปตฺตวโร ปุฏกมฺม ทสาติฯ
4. อพฺภนฺตรวคฺโค
281. อพฺภนฺตรชาตกํ (3-4-1)
[91]
อพฺภนฺตโร นาม ทุโม, ยสฺส ทิพฺยมิทํ ผลํ;
ภุตฺวา โทหฬินี นารี, จกฺกวตฺติํ วิชายติฯ
[92]
ตฺวมฺปิ [ตฺวญฺจ (สี. ปี.), ตฺวํ หิ (ก.)] ภทฺเท มเหสีสิ, สา จาปิ [จาสิ (สี. ปี.)] ปติโน ปิยา;
อาหริสฺสติ เต ราชา, อิทํ อพฺภนฺตรํ ผลํฯ
[93]
ภตฺตุรตฺเถ ปรกฺกนฺโต, ยํ ฐานมธิคจฺฉติ;
สูโร อตฺตปริจฺจาคี, ลภมาโน ภวามหนฺติฯ
อพฺภนฺตรชาตกํ ปฐมํฯ
282. เสยฺยชาตกํ (3-4-2)
[94]
เสยฺยํโส เสยฺยโส โหติ, โย เสยฺยมุปเสวติ;
เอเกน สนฺธิํ กตฺวาน, สตํ วชฺเฌ [มจฺเจ (ก.), พชฺเฌ (ก. อฏฺฐ.)] อโมจยิํฯ
[95]
[กสฺมา…เป.… สคฺคํ น คจฺเฉยฺย (กตฺถจิ)] ตสฺมา สพฺเพน โลเกน, สนฺธิํ กตฺวาน เอกโต [เอกโก (สี. สฺยา. ปี.)];
เปจฺจ สคฺคํ นิคจฺเฉยฺย [กสฺมา…เป.… สคฺคํ น คจฺเฉยฺย (กตฺถจิ)], อิทํ สุณาถ กาสิยา [กาสโย (สี. ปี.)]ฯ
[96]
อิทํ วตฺวา มหาราชา, กํโส พาราณสิคฺคโห;
ธนุํ กณฺฑญฺจ [ตูณิญฺจ (สี. ปี.)] นิกฺขิปฺป, สํยมํ อชฺฌุปาคมีติฯ
เสยฺยชาตกํ ทุติยํฯ
283. วฑฺฒกีสูกรชาตกํ (3-4-3)
[97]
วรํ วรํ ตฺวํ นิหนํ ปุเร จริ, อสฺมิํ ปเทเส อภิภุยฺย สูกเร;
โส ทานิ เอโก พฺยปคมฺม ฌายสิ, พลํ นุ เต พฺยคฺฆ น จชฺช วิชฺชติฯ
[98]
อิเม สุทํ [อิมสฺสุ ตา (สฺยา. ก.)] ยนฺติ ทิโสทิสํ ปุเร, ภยฏฺฏิตา เลณคเวสิโน ปุถุ;
เต ทานิ สงฺคมฺม วสนฺติ เอกโต, ยตฺถฏฺฐิตา ทุปฺปสหชฺชเม [ทุปฺปสหชฺชิเม (สฺยา.)] มยาฯ
[99]
นมตฺถุ สงฺฆาน สมาคตานํ, ทิสฺวา สยํ สขฺย วทามิ อพฺภุตํ;
พฺยคฺฆํ มิคา ยตฺถ ชินิํสุ ทาฐิโน, สามคฺคิยา ทาฐพเลสุ มุจฺจเรติฯ
วฑฺฒกีสูกรชาตกํ ตติยํฯ
284. สิริชาตกํ (3-4-4)
[100]
ยํ อุสฺสุกา สงฺฆรนฺติ, อลกฺขิกา พหุํ ธนํ;
สิปฺปวนฺโต อสิปฺปา จ, ลกฺขิวา ตานิ ภุญฺชติฯ
[101]
สพฺพตฺถ กตปุญฺญสฺส, อติจฺจญฺเญว ปาณิโน;
อุปฺปชฺชนฺติ พหู โภคา, อปฺปนายตเนสุปิฯ
[102]
กุกฺกุโฏ [กุกฺกุฏ (สี. ปี.), กุกฺกุฏา (สี. นิสฺสย, สทฺทนีติ)] มณโย ทณฺโฑ, ถิโย จ ปุญฺญลกฺขณา;
อุปฺปชฺชนฺติ อปาปสฺส, กตปุญฺญสฺส ชนฺตุโนติฯ
สิริชาตกํ จตุตฺถํฯ
285. มณิสูกรชาตกํ (3-4-5)
[103]
ทริยา สตฺต วสฺสานิ, ติํสมตฺตา วสามเส;
หญฺญาม [หญฺเฉม (สี. ปี.), หญฺฉาม (?)] มณิโน อาภํ, อิติ โน มนฺตนํ อหุฯ
[104]
ยาวตา มณิํ ฆํสาม [ยาว ยาว นิฆํสาม (สี. ปี.)], ภิยฺโย โวทายเต มณิ;
อิทญฺจ ทานิ ปุจฺฉาม, กิํ กิจฺจํ อิธ มญฺญสิฯ
[105]
อยํ มณิ เวฬูริโย, อกาโจ วิมโล [วิปุโล (ก.)] สุโภ;
นาสฺส สกฺกา สิริํ หนฺตุํ, อปกฺกมถ สูกราติฯ
มณิสูกร [มณิฆํส (ก.)] ชาตกํ ปญฺจมํฯ
286. สาลูกชาตกํ (3-4-6)
[106]
มา สาลูกสฺส ปิหยิ, อาตุรนฺนานิ ภุญฺชติ;
อปฺโปสฺสุกฺโก ภุสํ ขาท, เอตํ ทีฆายุลกฺขณํฯ
[107]
อิทานิ โส อิธาคนฺตฺวา, อติถี ยุตฺตเสวโก;
อถ ทกฺขสิ สาลูกํ, สยนฺตํ มุสลุตฺตรํฯ
[108]
วิกนฺตํ [วิกตฺตํ (สี.), วิกนฺติยมานํ ฉินฺทิยมานํติ อตฺโถ] สูกรํ ทิสฺวา, สยนฺตํ มุสลุตฺตรํ;
ชรคฺควา วิจินฺเตสุํ, วรมฺหากํ ภุสามิวาติฯ
สาลูกชาตกํ ฉฏฺฐํฯ
287. ลาภครหชาตกํ (3-4-7)
[109]
นานุมฺมตฺโต นาปิสุโณ, นานโฏ นากุตูหโล;
มูฬฺเหสุ ลภเต ลาภํ, เอสา เต อนุสาสนีฯ
[110]
ธิรตฺถุ ตํ ยสลาภํ, ธนลาภญฺจ พฺราหฺมณ;
ยา วุตฺติ วินิปาเตน, อธมฺมจรเณน [อธมฺมจริยาย (สี. สฺยา.)] วาฯ
[111]
อปิ เจ ปตฺตมาทาย, อนคาโร ปริพฺพเช;
เอสาว ชีวิกา เสยฺโย [เสยฺยา (สี. สฺยา. ปี.)], ยา จาธมฺเมน เอสนาติฯ
ลาภครหชาตกํ สตฺตมํฯ
288. มจฺฉุทฺทานชาตกํ (3-4-8)
[112]
อคฺฆนฺติ มจฺฉา อธิกํ สหสฺสํ, น โส อตฺถิ โย อิมํ สทฺทเหยฺย;
มยฺหญฺจ อสฺสุ อิธ สตฺต มาสา, อหมฺปิ ตํ มจฺฉุทฺทานํ กิเณยฺยํฯ
[113]
มจฺฉานํ โภชนํ ทตฺวา, มม ทกฺขิณมาทิสิ;
ตํ ทกฺขิณํ สรนฺติยา, กตํ อปจิติํ ตยาฯ
[114]
ปทุฏฺฐจิตฺตสฺส น ผาติ โหติ, น จาปิ ตํ [นํ (สี. สฺยา.)] เทวตา ปูชยนฺติ;
โย ภาตรํ เปตฺติกํ สาปเตยฺยํ, อวญฺจยี ทุกฺกฏกมฺมการีติฯ
มจฺฉุทฺทานชาตกํ อฏฺฐมํฯ
289. นานาฉนฺทชาตกํ (3-4-9)
[115]
นานาฉนฺทา มหาราช, เอกาคาเร วสามเส;
อหํ คามวรํ อิจฺเฉ, พฺราหฺมณี จ ควํ สตํฯ
[116]
ปุตฺโต จ อาชญฺญรถํ, กญฺญา จ มณิกุณฺฑลํ;
ยา เจสา ปุณฺณิกา ชมฺมี, อุทุกฺขลํภิกงฺขติฯ
[117]
พฺราหฺมณสฺส คามวรํ, พฺราหฺมณิยา ควํ สตํ;
ปุตฺตสฺส อาชญฺญรถํ, กญฺญาย มณิกุณฺฑลํ;
ยญฺเจตํ ปุณฺณิกํ ชมฺมิํ, ปฏิปาเทถุทุกฺขลนฺติฯ
นานาฉนฺทชาตกํ นวมํฯ
290. สีลวีมํสกชาตกํ (3-4-10)
[118]
สีลํ กิเรว กลฺยาณํ, สีลํ โลเก อนุตฺตรํ;
ปสฺส โฆรวิโส นาโค, สีลวาติ น หญฺญติฯ
[119]
โสหํ สีลํ สมาทิสฺสํ, โลเก อนุมตํ สิวํ;
อริยวุตฺติสมาจาโร , เยน วุจฺจติ สีลวาฯ
[120]
ญาตีนญฺจ ปิโย โหติ, มิตฺเตสุ จ วิโรจติ;
กายสฺส เภทา สุคติํ, อุปปชฺชติ สีลวาติฯ
สีลวีมํสกชาตกํ ทสมํฯ
อพฺภนฺตรวคฺโค จตุตฺโถฯ
ตสฺสุทฺทานํ –
ทุม กํสวรุตฺตมพฺยคฺฆมิคา, มณโย มณิ สาลุกมวฺหยโน;
อนุสาสนิโยปิ จ มจฺฉวโร, มณิกุณฺฑลเกน กิเรน ทสาติฯ
5. กุมฺภวคฺโค
291. สุราฆฏชาตกํ (2-5-1)
[121]
สพฺพกามททํ กุมฺภํ, กุฏํ ลทฺธาน ธุตฺตโก;
ยาว นํ อนุปาเลติ, ตาว โส สุขเมธติฯ
[122]
ยทา มตฺโต จ ทิตฺโต จ, ปมาทา กุมฺภมพฺภิทา;
ตทา นคฺโค จ โปตฺโถ จ, ปจฺฉา พาโล วิหญฺญติฯ
[123]
เอวเมว โย ธนํ ลทฺธา, ปมตฺโต [อมตฺตา (สี.), อมตฺโต (ปี.)] ปริภุญฺชติ;
ปจฺฉา ตปฺปติ ทุมฺเมโธ, กุฏํ ภิตฺวาว [กุฏํ ภินฺโนว (สี. ปี.), กุฏภินฺโนว (?)] ธุตฺตโกติฯ
สุราฆฏ [ภทฺรฆฏ (สี. ปี.), ภทฺรฆฏเภทก (สฺยา.)] ชาตกํ ปฐมํฯ
292. สุปตฺตชาตกํ (3-5-2)
[124]
พาราณสฺยํ [พาราณสฺสํ (สี. ปี.)] มหาราช, กากราชา นิวาสโก [นิวาสิโก (สี. ปี.)];
อสีติยา สหสฺเสหิ, สุปตฺโต ปริวาริโตฯ
[125]
ตสฺส โทหฬินี ภริยา, สุผสฺสา ภกฺขิตุมิจฺฉติ [มจฺฉมิจฺฉติ (สี. ปี.)];
รญฺโญ มหานเส ปกฺกํ, ปจฺจคฺฆํ ราชโภชนํฯ
[126]
เตสาหํ ปหิโต ทูโต, รญฺโญ จมฺหิ อิธาคโต;
ภตฺตุ อปจิติํ กุมฺมิ, นาสายมกรํ [มกริํ (สี. นิสฺสย)] วณนฺติฯ
สุปตฺตชาตกํ ทุติยํฯ
293. กายนิพฺพินฺทชาตกํ (3-5-3)
[127]